Petrus Nesterov

Petrus Nicolai filius Nesterov (Russice Пётр Николаевич Нестеров, tr. Pëtr Nikolaevič Nesterov; 27 Februarii 1887 – 8 Septembris 1914) fuit aviator militaris Russicus.

Nesterov est auctor nonnullarum innovationium technicarum aeroplanis. Notus est ut primus aviator, qui volatum formam laquei habentem in plano verticali perfecit (die 9 Septembris 1913; Russica lingua Mërtvaya Petlia Nesterova, "Мёртвая петля Нестерова).

Periit in Bello Orbis Terrarum Primo cum primus in omnibus militibus aeroplanum hostilem contudisset, aeroplano suo ut ariete utens.

Vita

Petrus Nesterov Novogardiae Inferiori in Russia, die 27 Februarii anno 1887, familia mediae ordinis, patre praefecto Exercitus Russici et magistro Ludi Tironum natus est. Patre mortuo pecunia familiaris valde diminuta est, et mater Margarita Fiodorovna, rebus necessariis carens, in domum qua viduis subveniebatur se conferre debuit. Petrus die 26 Augusti anno 1897, 10 annos natus, in eundem Ludum Tironum Novogardiae Inferioris ingressus est ubi pater magister fuerat, et eodem egressus est anno 1904. Cum in sex optimis Ludi discipulis esset, stipendium adeptus et in Ludum Tormentarium urbis Mikhailovskoe missus est. Anno 1906 Nesterov cum honoribus ludo exiit, ad gradum subpraefecti ascendit, et Vladivostokium in Nonam Legionem Tormentariam Siberiae Orientalis missus est, ubi ipse artem iactuum armorum igniferarum de aërostato corrigendorum auxit.

Anno 1910 Petri Nesterov fervor in aëronautica invaluit. Mense Iulio aut Augusto anni 1911, dum otium Novogardiae Inferiori in urbe patria agit, congressus est cum Petro Sokolov, discipulo Nicolai Žukovskij, et in Societatem Aëronauticam Novogardiae Inferioris ingressus est. Anno 1912 pro aviatore militari emissus est. 25 annos natus, mense Septembri anno 1912 primum volatum solitarium fecit in biplano Francico "Farman". Anno 1913 cursu praefectorio in Ludo Aëronautico defunctus est, quo anno Kioviam in turmam aëriam Exercitus Russici missus est. Illo tempore commilito et sodalis erat aliorum clarissimorum aviatorum Russorum Inguari Sikorski atque Victoris Tkačov. Mox factus est praefectus rectorque cohortis aëriae. Varsoviae in Polonia cursibus exaequatoriis aëroplani Newport, quod inter alias species aëroplanorum tum Exercitus Russicus possidebat, functus est.

Nesterov, cum aviator peritissumus fieret, ad aëroplana struenda se vertit. Primum aëroplanum construxit anno 1910, 23 annos natus, haud longe post gradum subpraefecti tormentarii habitum. Anno 1913 exemplar motoris aëroplani 7 cylindrorum et potentiae 120 HP struxit. Partem laboris in aëroplano venatorio una sella struendo susceptam perficere non potuit, cum in agmina Belli Orbis Terrarum Primi mitteretur.

Laqueus Nesterov

Ut sententiam suam, navem aëriam in aëre semper fulcra habere, demonstraret, Petrus Nesterov die 27 Augusti anno 1913, super campum Syrezkij Kioviae, nave Nieuport IV motore Gnome instructa, primum volatum figura laquei clausi erecti effecit. Secundum relationem publicam volatus, auriga 1000 metris altitudinis super solum motorem interrupit et cadere coepit. Continuo 600 metris altitudinis motorem iterum incensit, ascendere coepit donec laqueum effecerat, et motore interrupto iterum praceps cecidit. Postea navem aequavit, spira descendit, et ad terram moderanter devectus est.

Post 12 diebus simile artificium perfecit aviator Francogallicus Adolfus Pegoud, quod facinus divulgatum est et patriae et orbis libellis. Cum ipse Pegoud mense Maio 1914 Petropolin advenisset ut artificium laquei populo demonstraret, tum primum Sodalicium Aëronauticum Imperii Russici advertit id prius ab aviatore Russico factum non esse conscriptum. Die tamen 10 Februarii anno 1914 decus Aurei Nomismatis Socialis Petro Nesterov a Societate Aëronautica Kioviensi inditum erat ob merita in arte aëronautica artificiumque laquei primum effectum.

Bellum Orbis Terrarum Primum

Petrus Nesterov, initio Belli Orbis Terrarum Primi in Agmina Austro-Occidentalia missus, expugnationi Leopolis interfuit. Artem aëronauticam expoliens, rationes et docuit et gessit, quibus milites aërii et terrestres una agerent, invenitque rationes pugnarum aëriarum, cum diurnarum tum etiam nocturnarum. Crebro speculabatur volans et fuit inter eos aviatores Russicos, qui primi ex caelo hostem percusserunt telis tormentariis ad illud compositis. Ob quam pugnam rectores Exercitus Austriaci magnam pecuniam ei, qui navem Petri Nesterov fregisset, spoponderunt.

Anno scilicet 1914 naves aërii nondum arma propria habebant, cum arma ignifera non magna aviatores modo tenerent. Pugnae aëriae eis levibus armis vel granatis desuper in navem hostilem coniectis fiebant.

Die 8 Septembris anno 1914, prope urbem Žolkva, in caelo congressus est Petrus Nesterov cum nave hostili Albatros Francisci Malina et Frederici von Rosenthal, qui super turmas Exercitus Russici volantes speculabantur extra iactum terrestrium telorum. Ipse in aëroplano levi velocique Morane se hostibus obiecit, quos congressum vitare tendentes excepit et gubernaculum Albatros nave sua impulit. Ambae machinae in terram conciderunt, et omnes milites obierunt.

Sic primus aviatorum militarium Petrus Nesterov arietationem aëriam fecit. In sepulcreto Lukianovskoe urbis Kioviae sepultus est. Die 25 Ianuarii anno 1915, Nicolaus II imperator Russiae Petrum Nesterov Ordine Sancti Georgi, qui tum maximus honos in Russia habebatur, mortuum decoravit.